Sáttmáli um nýggjan Hvalbiartunnil undirskrivaður

vinna14-03-2019 - 11:16 - Jóanis Nielsen

Landsverk:

VERKÆTLAN: Fyri løtu síðani skrivaðu Landsverk og Articon undir arbeiðstakarasáttmála um arbeiðið at gera nýggja Hvalbiartunnilin. Sostatt er tað skjótt klárt at fara undir nýggju farleiðina til Hvalbiar, ið fevnir um bæði tunnil og vegagerð.

Verkætlanin viðvíkjandi nógv umrødda tunlinum til Hvalbiar við tilhoyrandi vegagerð, er nú komin so væl áleiðis, at sáttmáli er undirskrivaður. Hetta hendi nú fyri løtu síðani, tá virkandi stjórin á Landsverki, Árant Andriasson, og Jón Sigurdsson, stjóri á Articon, skrivaðu undir arbeiðstakarasáttmála um gerð av tunli og tilkoyringarvegum. Eisini vóru Heðin Mortensen, landsstýrismaður í samferðslumálum, suðuroyar-politikkararnir Kristin Michelsen og Bjarni Hammer og Poul Michelsen, uttanríkis- og vinnumálaráðharri til staðar, tá undirskrivað var.

Trý feløg vóru undangóðkend at bjóða upp á hesa verkætlan, og lægsta tilboðið átti Articon, sum vil gera nýggju farleiðina millum Hvalba og Trongisvág fyri stívar 236 mió. krónur. Tekniskur ráðgevi er Landsbyggifelagið. Hinar fyritøkurnar, sum vóru undangóðkendar, vóru J&K Petersen og NCC.

Kunnandi fundur um nýggju farleiðina til Hvalbiar var suðuri í Salt sunnudagin í farnu viku, har Landsverk greiddi frá tilmældu linjuføringini og eisini nýtti høvi at lýsa fyrimunir og vansar við alternativu linjuføringini. Les meira um kunnandi fundin í Salt og linjuføringarnarher

Avgerð er nú tikin um at halda fast í tilmældu linjuføringini, ið kommunurnar og Landsverk leingi hava arbeitt við. Onkrar tillagingar verða møguliga gjørdar, soleiðis at hædd verður tikin fyri teimum viðmerkingum um veður og vind, sum staðkend eru komin við.

Nýggi tunnilin verður sostatt framvegis gjørdur frá undir Gjánhomrum í Trongisvági til Niðastabotn í Hvalba, og landsvegir verða gjørdir frá tunnilsmunnanum trongisvágsmegin til verandi landsveg í Trongisvági og frá tunnilsmunnanum hvalbiarmegin til Nesveg, tætt við brúnna um Kjógvavatn. Sambært stjóranum í Articon, Jón Sigurdsson byrjar arbeiðið beinanvegin.

Fakta um nýggjan Hvalbiartunnil
Tunnilslongdin verður 2,5 kilometrar, tilkoyringarvegurin trongisvágsmegin 0,9 kilometrar, og hvalbiarmegin 2,3 kilometrar. Samlaði kostnaðurin er sambært verklagslógini 272 milliónir krónur. Umframt arbeiðstakaraútreiðslur fevnir samlaða játtanin eisini um prosjektering, prosjektleiðslu, ráðgeving, eftirlit, el-arbeiðstøku og annað.

Fakta um verandi Hvalbiartunnil
Hvalbiartunnilin, sum var tikin í nýtslu í 1963, er elsti tunnil í Føroyum. Nakrar dagføringar eru gjørdar, men tunnilin er lágur og einbreytaður. Bæði tunnil og vegur liggja høgt, eins og vegurin eru smalur og í brattara lagi. Tunnilin lýkur ikki dagsins krøv til trygd, dygd og ferðslu, eins og farleiðin er ein forðing fyri vinnumenning og útbyggingum í bygdunum norðan fyri tunnilin.