Talv: Stórur spenningur undan seinasta umfari

ítróttur18-03-2019 - 06:55 - Jóanis Nielsen

Talvsamband Føroyar skrivar:

Støðan er óbroytt í oddanum eftir dystirnar í dag í næstsíðsta umfari í landskappingini í talvi.

Oddaliðini Sandavágs Talvfelag og Havnar Telvingarfelag vunnu bæði sínar dystir í dag 3-1. Vágamenn eru tí framvegis hálvtannað stig undan havnarmonnum. Avgerðin í kappingini fellur, tá oddaliðini bresta saman í seinasta umfari 6. apríl.

Rógvi Egilstoft Nielsen fekk ikki verið við á liðnum hjá Sandavágs Talvfelag norðuri í Klaksvík í dag, tí sum liðskipari hjá EB/Streymi í Betri-deildini var hann á vølli á Hólmanum á Eiði í dysti móti B36. Kortini eydnaðist vágamonnum at vinna 3-1 á B-liðnum hjá Klaksvíkar Talvfelag.

Høgni Egilstoft Nielsen, Torkil Nielsen og avloysarin Ingi Wiberg vunnu allir síni talv. Mótstøðumenninir vóru ávikavist Finnbjørn Vang, Tummas Martin Sólsker og Ingolf Gaard. Rani Baldursson vann sum hin einasti á heimaliðnum á Silas Eyðsteinsson. Hvørki Terji Petersen ella Rani Nolsøe, sum vanliga sita á fremstu borðunum á øðrum liði hjá klaksvíkingum, vóru við í dag.

Í Havn stóð dysturin millum A-liðini hjá Havnini og Klaksvík. Havnarmenn vunnu 3-1. Helgi Dam Ziska vann á 1. borði móti Ólavi Simonsen, sama gjørdi Carl Eli Samuelsen á 4. borði móti Janus Skaale. Á hinum borðunum endaði tað javnt. Martin Poulsen og Steintór Rasmussen á 2. borði og Olaf Berg og Wille Olsen á 3. borði.

Triði dysturin í 1. deild var millum Kollafjørð og Havnina B. Kollfirðingar vunnu 2½-1½. Kári Petersen og Bernhard Thomsen vunnu á Herluf Hansen og Leif Reinert Fjallheim, á 1. borði var javnt millum Eyðálv Johannesen og Rógva Mortensen, og á 4. borði vann Margar Berg á Rógva Mørkøre.

Støðan í 1. deild fyri seinasta umfar:

Sandavágur 28 stig
Havnin 26½

Klaksvík 16

Havnin B 14½

Kollafjørður 12

Klaksvík B 11

Finaludystur um FM-heitið

Nú er greitt, at avgerðin um FM-heitið í liðkappingini í talvi fellur í dystinum millum oddaliðini Sandavág og Havnina í seinasta umfari, sum verður leygardagin 6. apríl.

Vágamenn hava fyrimunin og standa seg við javnleiki ella teprum ósigri. Skal Havnar Telvingarfelag endurvinna FM-heitið krevst, at teir vinna henda finaludystin í minsta lagi 3-1.

Hjá vágamonnum verður helst umráðandi at hava allar sínar bestu telvarar tøkar til henda avgerandi dystin, men her kann fótbólturin leggja teimum meinbogar í vegin.

Høgni Egilstoft Nielsen og Silas Eyðsteinsson spæla báðir við 07 Vestur í næstbestu deildini, og teir hava henda sama dag útidyst móti EB/Streymi. Teir hava nú tríggjar vikur at loysa tann knútin.

Vanliga verður seinasta umfarið í landskappingini skipað sum felagsumfar, men í løtuni er ikki greitt, hvar telvað verður henda seinasta kappingardagin.

Vestmenningar á sigurskós

Gamla stórfelagið í føroyskari telving, Vestmanna Talvfelag, er aftur á veg í bestu deildina.

Teir standa í løtuni til at vinna 2. deild, men avgerðin fellur ikki fyrr enn í síðsta umfari. Bara Havnar Telvingarfelag kann fáa teir aftur.

Men av tí at havnarmenn hava tey tvey loyvdu liðini í fremstu deildini, og Havnin B ikki kann enda aftast, sum støðan er vorðin, er uppflytingin hjá vestmenningum longu ein royndur lutur.

Í 3. deild stendur kappingin millum kollfirðingar og klaksvíkingar.

Støðan í 2. deild

Vestmanna 25½

Havnin 24

Sandavágur 17

Runavík 15½

Havnin B 13½

Gøta 12½

Støðan í 3. deild

Kollafjørður 20

Klaksvík 19½

Sandavágur 17½

Sandavágur B 16

Toftir 14½

Klaksvík B 12

Vestmanna 10½

Kollafjørður B 9½

EB/Streymur 4½

Landskappingin endar leygardagin 6. apríl, tá allir dystir í tíggjunda og seinasta umfari verða telvaðir.