Jóanis Nielsen
Hagstovan skrivar:
Nýggjasta navnauppgerðin fevnir um fornøvn (1. navn ella 1. og 2. navn) á persónum, sum búðu í Føroyum tann 1. januar. Sum nakað nýtt ganga navnahagtølini nú aftur til 1985.
Baldur, Brandur og Kristian eru best umtóktu nøvnini til dreingir føddir í 2022. Fimm dreingir fingu navnið Baldur, fimm Brandur og fimm Kristian.
Onnur vælumtókt nøvn hjá dreingjum vóru Mattias, Nóa og Tóki. Seks dreingir, føddir í fjør, hava ikki fingið navn enn.
Best umtóktu nøvn hjá dreingjum føddir í 2022
| Persóntal | |||||
|---|---|---|---|---|---|
| 2022 | 2021 | 2012 | 2002 | 1992 | |
| Baldur | 5 | 2 | 1 | 2 | 0 |
| Brandur | 5 | 3 | 4 | 6 | 1 |
| Kristian | 5 | 0 | 3 | 1 | 4 |
| Mattias | 4 | 5 | 4 | 1 | 0 |
| Nóa | 4 | 9 | 4 | 1 | 0 |
| Tóki | 4 | 2 | 2 | 3 | 0 |
| Bartal | 3 | 1 | 1 | 1 | 2 |
| Eli | 3 | 1 | 1 | 0 | 4 |
| Gilli | 3 | 5 | 0 | 1 | 2 |
| Gutti | 3 | 2 | 0 | 1 | 0 |
| Jónas | 3 | 11 | 8 | 8 | 1 |
| Levi | 3 | 1 | 0 | 2 | 2 |
| Markus | 3 | 5 | 3 | 4 | 0 |
| Ragnar | 3 | 3 | 2 | 0 | 2 |
| Rói | 3 | 2 | 0 | 2 | 4 |
| Rókur | 3 | 0 | 5 | 2 | 0 |
| Silas | 3 | 3 | 4 | 2 | 0 |
Nøvnini Baldur, Brandur og Kristian eru fyri fyrstu ferð á fyrstaplássinum fyri best umtókta navn á dreingjum. Tað skula vanliga fleiri til enn fimm við sama navni fyri at enda ovast á listanum fyri best umtókta navn.
Hóast Brandur ikki hevur verið ovast á listanum áður, so hevur Brandur verið eitt væl umtókt navn seinastu 20 árini. Tað vóru tó eisini fimm, ið fingu navnið Brandur í 2020, seks í 2002 og sjey í 2005, men tá hevur tað ikki verið nokk til at røkka fyrstaplássinum.
Kristian hevur ikki verið millum best umtóktu nøvnini síðani 2014, tá seks dreingir vórðu nevndir Kristian. Av best umtóktu nøvnunum í 2022 er Kristian mannfólkanavnið, ið er mest vanligt.
Baldur er ikki eitt eins vanligt navn sum Brandur og Kristian. Bert einaferð áður hava fimm dreingir í sama árgangi fingið navnið Baldur. Tað var í 2019, tá Baldur var triðbest umtókta navnið fyri dreingir.