Fleiri enn 140 arbeiðspláss taka lut í Ítrótta- og rørsluvikuni

Fleiri enn 140 arbeiðspláss taka lut í Ítrótta- og rørsluvikuni

Í dag byrjar fyrsta Ítrótta- og rørsluvika í Føroyum. Tað eru Ítróttasamband Føroya, Heilsustýrið og Heilsu- og orkumálaráðið, sum hesar dagarnar eggja øllum føroyingum til at røra seg. Fyriskipararnir eru fegnir um góða og fjølbroytta tilmelding, og ígjøgnum vikuna er møguleiki hjá fleiri at koma við. Alt ger mun, og alt telur.

- Nú Ítrótta- og rørsluvikan “VIT ERU VIД verður á fyrsta sinni, hava vit serliga heitt á arbeiðspláss um at taka lut, og undirtøkan er sera góð. Omanfyri 140 arbeiðspláss hava meldað til, og leiðararnir gera sjálvir av, hvussu júst teirra arbeiðspláss kann fáa meira rørslu inn í gerandisdagin, greiðir Katrin á Neystabø, samskipari, frá. 

Hugskotið er, at vit savna metrar, og í felag skulu vit koma kring føroysku strandarlinjuna, sum er 1.291.557 metrar. Leiðarar og arbeiðspláss verða eggjað til at seta rørslu á dagskrá við at seta eitt rørslumál fyri vikuna og gera eina vikuskrá. Tað kann t.d. vera, at vit skulu flyta okkum kring Nólsoynna, Eysturoynna ella allar Føroyar. 

Hvussu savna vit metrar?
Talan kann vera um, at arbeiðsplássið leggur upp til, at vit ganga til arbeiðis, taka eyka túrar í trappunum ella fara ein túr í døgverðatímanum. Tað kann eisini vera við smáum rørsluskáum á 2-4 minuttir. Ein rørsluskái er ein stuttur rørslusteðgur, har skipa verður fyri einfaldum rørslum. Vit vita, at hugskotini eru nógv og kreativ.

- Øll rørsla hesa vikuna verður síðani skrásett og roknað um til metrar. Tá vikan er av, síggja vit,

hvussu ofta vit í felag hava megnað at flutt okkum kring føroysku strandarlinjuna.

Endamálið við vikuni er at seta rørslu á dagskrá og eggja arbeiðsplássum, skúlum, stovnum og felagsskapum til rørslu. Tí vit vita, at reglulig rørsla í gerandisdegnum betrar um trivnaðin, og starvsfólk, sum trívast, avrika betur. Hartil hava rørsluvon fólk lættari við at luttaka í rørsluvirksemi í frítíðini.

Ítrótta- og rørsluvikan er úrslit av samstarvsavtalu, sum fyriskipararnir hava gjørt við endamálinum at styrkja fólkaheilsuna í Føroyum og skapa góðar karmar fyri heilsugóðum lívi í góðum og tryggum felagsskapum. 

Vilt tú vera við - kanst tú skunda tær inn á www.itrottaogrorsluvika.fo. Har kanst tú bæði skráseta teg ella  títt arbeiðspláss – og fáa góðan íblástur til, hvussu tit fáa meiri rørslu inn í arbeiðsdagin.

Heilsu- og orkumálaráðið, Heilsustýrið og Ítróttasamband Føroya.