Vandi var á ferð tá ið Smaragd fór at leka

Beint fyri klokkan 21:30 í gjárskvøldið fekk MRCC støðin eina fráboðan um, at Smaragd ið hevði verið til fiskiskap var farin at leka. Smaragd var tá staddur millum Borðoyarnes og Gøtunes.

Brimil ið var staddur á Fuglafirði var skjótur á staðið. Somuleiðis var Rescue Ziska tilkallaður og skjótur á staðið, sigur vakthavandi á MRCC støðini í morgun.

Tyrlan var eisini tilkallað og á staðnum.

Tað rak hart suður og Brimil fekk við hjálp frá Ziska sleipitrossa umborð á Smaragd, tá vóru teir staddir stutt eystur úr Mjóvanesi.

Eitt rør var farið at leka í maskinrúminum. Tá ið Smaragd var sleiðaður inná slættari sjógv setti Brimil pumpur og aggregat umborð.

Vandi var á ferð, tað var vánaligt veður, óslætt á sjónum, og tað rak upp í ættina.

Brimil sleipaði, við hjálp frá Ziska, Smaragd á Klaksvík. Hjálparveitingin var liðug kl.0320.