Revsitiltøk móti føroyskari veitingarvinnu

Ótrúligt, sum sosialistisku flokkarnir Framsókn, Tjóðveldi og Javnaðarflokkurin eru hatskir og eirindaleysir móti okkara privata vinnulívi. Hava tey ongantíð hoyrt um hvat hendir, um tú kvalir gullhønurnar?

Í dag eru revsitiltøk sett í verk móti føroyskari veitingarvinnu. Skálkaskjólið hjá okkara Javnaðarstjórn er Russland. Okkara veitingarvinna missir 100-tals milliónir kr., sum nú Norra ger sær dælt av. Kundarnir riknir til Norra og Russland er fullkomiliga óávirkað. Taparin er føroyska veitingarvinnan.

Í vár samtykti samgongan at plyndra fiskivinnuna við okurs tilfeingisgjøldum. Hetta gongur serliga út yvir heimaflotan, sum frammanundan liggur í tungum sjógvi. Á oyggjarleikum fegnast allir føroyingar um heiðurmerki, meðan samgongan hevur prýtt seg við heimsmeti í tilfeingiskatti.

Eisini samtyktið samgongan at plyndra alivinnuna við m.a. 4-falding av toppskattinum. Frá at hava eina alvinnu í heimsflokki hava sosialistarnir nú fingið heimsmet í skatting av alivinnuni. Hesi bæði ganga sjaldan hond í hond.

Alt hetta meðan løntakarin verður knokkroyttur við helst hægsta skatti í heiminum.

Hóast øll hesi heimsmeistaraheiti, so er samb. fíggjarkarmunum hjá landstýrinum, einki at rutta við. Uttan nýggj tiltøk, verður undirskot á fíggjarlógini næsta ár.

Grát mítt elskaða land.

Jørgen Niclasen, tingmaður Fólkafloksins