Fiskimálaráðharrin og Pontius Pilatus

Hvar eru partafólkini hjá fiskimálaráðharranum, ið siga seg umboða Norðoyggjar? Og ikki minst, hvar er varaborgarstjórin ella borgarstjórin í Klaksvíkar kommunu, nú menningin í línuvinnuni steðgar upp í Klaksvík? Vit tosa um væl omanfyri 100 ársverk.

Í besta kommunista-stíli sigur fiskimálaráðharrin:

(…) Hetta snýr seg ikki um persónar ella økir í landinum (…)

(…) Hetta snýr seg um lógina um sjófeingið (…)

Soleiðis eru stýrisamboðini hjá ábyrgdarleysum leiðarum, ið heilavaska fólkið við “Samanhaldinum í felagsskapinum.” Tíanbetur eru tað fleiri enn í Føroyum, ið skilja, at álop á einstaklingar ella øki eru álop á felagsskapin. Tá tú lættliga og kyniskt loypur á eitt øki ella ein persón, so kann tann næsti verða bæði tú, eg ella ein annar.

Línuvinnan hevur nógv tey síðstu árini ment seg ígjøgnum baldrutar upp- og niðurgongstíðir. Tað hava og eru bæði rakstrarligar og politiskar avbjóðingar. Ringast av hesum hava verið politisku avbjóðingarnar. Í Klaksvík eru vit fegin um tey tøk, ið eru tikin, og tey úrslit, ið fólkini ella einstaklingarnir hava útint fyri hesa vinnu og hendan bý. Tí vil eg upp á tað harðasta átala avvápningina av vinnulívinum í Klaksvíkar kommunu, har trongsygni, ábyrgdarloysi og pennastrok frá landsins leiðslu nú aftur hótta væl oman fyri 100 ársverk í kommununi!

Eitt pennastrok, ið ikki bjargar felagsskapinum, men eitt álop á persónar og øki. Landsstýrismaðurin er væl vitandi, eins og Pilatus, at hetta er ikki í lagi, tí vaskar hann sær um hendurnar við at peika á felagsskapin!

Eyðstein Ó. Poulsen